நிராகரிக்கப்பட்ட  வேட்புமனுக்கள் மீதான மறுபரிசீலனை|தேர்தல் ஆணையம் மறுப்பு

சிறீலங்காவில் நடைபெறவுள்ள உள்ளாட்சித் தேர்தலை முன்னிட்டு, நிராகரிக்கப்பட்ட வேட்புமனுக்களை மறுபரிசீலனை செய்ய வேண்டும் என்ற அரசியல் கட்சிகளின் கோரிக்கையை இலங்கை தேர்தல் ஆணையம் மறுத்து கருத்து வெளியிட்டுள்ளது.

தேர்தல் ஆணையத் தலைவர் ஆர்.எம்.ஏ.எல். ரத்நாயக்க, “அனைத்து நிராகரிப்புகளும் தேர்தல் சட்ட விதிகளின்படி மேற்கொள்ளப்பட்டவை. எனவே, ஆணையம் அவற்றை மறுபரிசீலனை செய்யவோ மாற்றவோ எந்த வாய்ப்பும் இல்லை,” என்று உறுதிபட கருத்துத் தெரிவித்துள்ளார்.

அரசியல் கட்சிகள் ஆணையத்தின் தீர்ப்பை எதிர்த்தால், சட்டரீதியான வழிமுறைகளை மேற்கொள்ளலாம் என்றார். இந்த அறிவிப்பு, 425 வேட்புமனுக்களில் சிலவற்றை மீண்டும் பரிசீலிக்க வேண்டும் என்று பல கட்சிகள் கோரிக்கை விடுத்ததனை அடுத்து வெளிவந்துள்ளது.

இதற்கிடையில், மே 6ஆம் தேதி நடைபெறவுள்ள உள்ளாட்சித் தேர்தலுக்கான வாக்குச் சீட்டுகளை அச்சிடும் பணிகள் திட்டமிட்டபடி ஏற்கனவே ஆரம்பித்து  நடைபெற்று வருவதாக தேர்தல் ஆணையம் தெரிவித்துள்ளது.