இலங்கையின் முன்னாள் இராணுவத் தளபதிகளை தடைசெய்யப்பட்டோர் பட்டியலில் ஐக்கிய இராச்சியம் இணைத்தது

இலங்கையில் நடைபெற்ற உள்நாட்டு போரின் போது மனித உரிமை மீறல்கள் மற்றும் துஷ்பிரயோகங்களுக்கு தொடர்புடையதாக கருதப்படும் முன்னாள் மூத்த இராணுவத் தளபதிகளுக்கு இன்று (24 03 25) ஐக்கிய இராச்சியம் தடையுத்தரவு விதித்துள்ளது.
இந்தத் தீர்ப்பின் படி, இலங்கை ஆயுதப்படைகளின் முன்னாள் தளபதி சவேந்திர சில்வா, முன்னாள் கடற்படைத் தளபதி வசந்த கரன்னாகொட, முன்னாள் இராணுவத் தளபதி ஜகத் ஜெயசூர்யா மற்றும் விடுதலைப் புலிகள் இயக்கத்தின் முன்னாள் இராணுவத் தளபதி விநாயகமூர்த்தி முரளிதரன் (கருணா) ஆகியோர் தடை செய்யப்பட்டவர்களின் பட்டியலில் சேர்க்கப்பட்டுள்ளனர்.

விடுதலைப் புலிகளுக்கு எதிராக இலங்கை இராணுவத்தின் சார்பில் செயல்பட்ட துணை இராணுவப் படையான கருணா குழுவை தலைமை தாங்கிய முரளிதரனும் இந்தத் தடையின் கீழ் உள்ளார்.
இங்கிலாந்து அரசு, இந்தத் தடைகள் மனித உரிமை மீறல்களுக்கு பொறுப்புக்கூறலை உறுதி செய்வதற்கும், தண்டனையிலிருந்து விலக்கு அளிக்கும் கலாசாரத்தை எதிர்க்கும் நடவடிக்கையாக அமையுமென்றும் தெரிவித்துள்ளது.